Lajme

G7 pajtohet t’i shtojë sanksionet kundër Rusisë

Gjatë një samiti në Japoni më 19 maj, krerët e vendeve të industrializuara të Grupit Shtatë (G7) njoftuan për zgjerimin e sanksioneve kundër Rusisë. Në të njëjtën kohë, zyrtarët ukrainas të sigurisë konfirmuan se presidenti Volodymyr Zelensky do të marrë pjesë në këtë takim që po zhvillohet në Hiroshimë.

G7-ta përbëhet nga Kanadaja, Franca, Gjermania, Italia, Japonia, Mbretëria e Bashkuar dhe Shtetet e Bashkuara.

Udhëheqësit e G7-ës thanë në një deklaratë të përbashkët se sanksionet e reja do të ndikojnë në “eksportet e makinerive industriale, mjeteve dhe teknologjive të tjera që Rusia përdor për të rindërtuar makinerinë e saj të luftës”.

Në këtë deklaratë thuhet se grupi do të vazhdojë të punojë për të pakësuar të ardhurat që Rusia i fiton nga tregtia e saj në metale dhe diamante.

Më herët gjatë ditës, Britania njoftoi për sanksione të reja kundër 86 qytetarëve rusë dhe subjekteve juridike që synojnë teknologjitë e avancuara ushtarake dhe importet e diamanteve për të shkurtuar “burimet e të ardhurave” të Moskës.

Një zyrtar i lartë ukrainas i sigurisë tha më herët se Zelensky do të marrë pjesë personalisht në samitin e G7-ës.

“Gjëra shumë të rëndësishme do të vendosen atje, prandaj presidenti ynë do të jetë i pranishëm, që është absolutisht thelbësore për të mbrojtur interesat tona”, tha për televizionin shtetëror Oleksiy Danilov, sekretar i Këshillit të Sigurisë Kombëtare dhe Mbrojtjes së Ukrainës.

Zelensky do të marrë pjesë në mbledhjen e 21 majit, ditën e tretë dhe të fundit të samitit.

Ndërkohë, Zelensky bëri të ditur se ka mbërritur më 19 maj në qytetin e Arabisë Saudite, Jedah, për të marrë pjesë në një samit të Ligës Arabe.

“Duke filluar vizitën time të parë ndonjëherë në Mbretërinë e Arabisë Saudite për të përmirësuar marrëdhëniet dypalëshe dhe lidhjet e Ukrainës me botën arabe”, shkroi ai në Twitter, duke shtuar se do të takohej me Princin e Kurorës Saudite, Mohammed bin Salman.

Al-Hadath TV, një stacion televiziv në pronësi saudite, raportoi se Zelensky udhëtoi për në Jedah me një aeroplan të Qeverisë franceze.

Rusia ka vazhduar të sulmojë qytetet ukrainase me sulme ajrore dhe raketore, duke rënduar luftimet e ashpra për kontrollin e qytetit lindor të Bahmutit.

Kievi u shënjestrua përsëri nga dronët e prodhuar nga Irani gjatë natës, sulmi i tillë i dhjetë nga fillimi i muajit, por të gjithë ata u shkatërruan nga mbrojtja ajrore e kryeqytetit, tha më 19 maj kreu i administratës ushtarake të Kievit, Serhiy Popko.

“Kjo taktikë e Kremlinit është një përpjekje për të mposhtur forcat tona kundërajrore dhe për të ushtruar presion psikologjik mbi civilët “, shkroi Popko në Telegram.

Mbrojtja ajrore ukrainase tha më 19 maj se kishte rrëzuar 16 dronë dhe një raketë lundruese gjatë natës, pa specifikuar vendndodhjen.

Shpërthime u raportuan në rajone gjerësisht të ndara, duke përfshirë Krivi Rih në Ukrainën qendrore dhe Rivne dhe Lutsk në perëndim.

Sulmet e fundit ndodhën pasi zyrtarët në rajonet lindore të Donjeckut dhe Harkivit thanë më 19 maj se tre civilë u vranë dhe 16 të tjerë u plagosën nga bombardimet ruse të një dite më parë.

Dy persona u vranë dhe nëntë të tjerë u plagosën në Donjeck, sipas Pavlo Kyrylenkos, që është kreu i administratës rajonale të Donjeckut.

Një burrë u vra dhe dy u plagosën në një sulm me raketa në një fshat në Harkiv, tha guvernatori rajonal Oleh Synyehubov.

Në 24 orët e fundit, ushtria ukrainase raportoi se Rusia kreu 39 sulme raketore, 39 sulme ajrore dhe lëshoi 50 sisteme raketash në vijën e frontit në Ukrainë. Qyteti i Bahmutit mbetet pika kryesore e betejave intensive.

“Armiku vazhdon të përqendrojë përpjekjet e tij kryesore në vijën e frontit Liman-Bahmut-Avdjivka-Marinka, ku u zhvilluan 29 përleshje luftarake gjatë ditës së kaluar. Betejat më të nxehta po zhvillohen për Bahmutin dhe Marinkan”, tha Shtabi i Përgjithshëm i Ushtrisë së Ukrainës në raportin e tij të mëngjesit të 19 majit.

Në Uashington, një zëdhënëse e Pentagonit tha se një sistem i mbrojtjes raketore Patriot i dëmtuar në një sulm ajror rus në Kiev disa ditë më parë u riparua.

“Ajo që mund të konfirmoj është se një sistem Patriot është dëmtuar, por ai tani është rregulluar dhe është plotësisht funksional”, tha Sabrina Singh në një konferencë për media./REL/