Franca teston me sukses raketën balistike me rreze të gjatë

Duke rritur besueshmërinë e aftësive parandaluese bërthamore të Francës, ky vend ka testuar me sukses një raketë balistike me rreze të gjatë M51.3, për faktin se pas pushtimit rus të Ukrainës në shkurt të vitit 2022, presidenti Vladimir Putin ka paralajmëruar vazhdimisht Perëndimin, se do të ishte gati të përdorte armë bërthamore “për të mbrojtur Rusinë”.

Sipas raportimeve nga mediat e huaja, raketa e cila nuk mbante armë bërthamore, u shkrep nga vendi i testimit të raketave Biscarosse të ushtrisë franceze në Francën jugperëndimore dhe u ul në Atlantikun e veriut, shkruan albinfo.ch.

Raketa M51.3 është një version i përmirësuar i M51, një raketë balistike strategjike me tre faza detare-tokësore e krijuar për t’u lëshuar nga nëndetëset e Marinës Franceze, teksa pritet të hyjë në shërbim rreth vitit 2025.

“Fluturimi ka lejuar të konfirmojë një përmirësim të madh të raketës që do të kontribuojë në besueshmërinë e qëndrueshme të parandalimit oqeanik të Francës në dekadat e ardhshme”, thuhet në deklaratën e Ministrisë së Mbrojtjes së Francës.

---