Franca përballet me vapën rekord, temperaturat afro 45°C

Temperaturat arritën deri në 44.3°C, ndërsa autoritetet raportojnë viktima, arrestime kardiake dhe ndërprerje në centralet bërthamore për shkak të valës ekstreme të të nxehtit.

Franca po përballet me një valë të paprecedentë të të nxehtit, e cila ka sjellë viktima dhe ka shkaktuar probleme të mëdha në mbarë vendin, transmeton albinfo.ch.

Një grua britanike ka humbur jetën pasi u sëmur në një kamping në qytetin bregdetar La Tranche-sur-Mer, ndërsa një djalë 3-vjeçar u gjet i vdekur brenda një makine në periferi të Parisit.

Sipas raportimeve, prindërit e kishin dërguar fëmijën në shtrat, por rreth 45 minuta më vonë konstatuan se ai nuk ndodhej në dhomë. Më pas e gjetën pa ndjenja në automjetin e parkuar pranë shtëpisë. Ende nuk është e qartë se si ai përfundoi brenda makinës.

Ky është rasti i tretë i një fëmije që humb jetën në Francë këtë javë si pasojë e kushteve ekstreme të motit, pasi edhe dy motër e vëlla vdiqën pasi u lanë në një automjet të nxehtë.

Temperaturat arritën në 44.3 gradë Celsius në qytetin Pissos, ndërsa mesatarja kombëtare shënoi 30 gradë, dita më e nxehtë e regjistruar ndonjëherë në Francë që nga fillimi i matjeve në vitin 1947.

Autoritetet shëndetësore kanë raportuar 25 raste të arrestit kardiak të lidhura me të nxehtin vetëm gjatë 24 orëve të fundit në Paris, ndërsa për shkak të temperaturave ekstreme janë ndalur edhe tre reaktorë bërthamorë në vend./Albinfo.ch

---