Fjalorit të gjuhës shqipe do t’i shtohen edhe 70 mijë fjalë të reja

Fjalorit të gjuhës shqipe do t’i shtohen edhe 70 mijë fjalë të reja e që nuk ishin të përfshira në vitin 1980.

Për hartimin e këtij fjalori janë përfshirë akademikë, gjuhëtarë të njohur nga të gjitha vendet shqipfolëse, përfshirë edhe universitetet e Shqipërisë dhe atë të Prishtinës, raporton Euronews.al,

Ali Jashari, profesor doktor në universitetin e Korçës, ka bërë me dije se ky fjalor do të vijë në ndihmë akademikëve, pedagogëve, përkthyesve, studentëve, gazetarëve dhe gjithë atyre që do të përdorin gjuhën shqipe.

“Vet fjalori është pasuri dhe fjalori me këtë numër fjalësh, kuptimesh e të tjera është një vegël e mjet që do u shërbejë të gjithëve për pasurimin e gjuhës. Përdoruesit e këtij fjalori janë të shumtë, duke filluar me shkencëtarë që merren me hartimin e fjalorëve, leksikografët, përkthyesit, pedagogët, studentët, shkollarët, ata që merren me gjuhën shqipe në shkolla, ata që hartojnë tekste shkollore, gazetarët e të gjithë llojeve mediave të shkruara dhe elektronike që do të kenë në dorë një mjet të fuqishëm për të pasuruar gjuhën shqipe dhe për ta mbajtur ashtu siç është, e bukur e fuqishme, që u përgjigjet gjithë nevojave”, tha Jashari, përcjell albinfo.ch.

Sipas profesorit, ka qenë e domosdoshme të realizohet kjo, për shkak të zbrazëtisë 43 vjeçare.

Profesori tha se fjalori ka 110 mijë fjalë pa llogaritur kuptimet, ka rreth 11 mijë e 500 njësi frazologjike dhe shumë njësi të tjera të ligjërimit.

Ai këto i tha gjatë një takimi që ka pasur në auditorët e universitetin “Fan Noli” të Korçës në ditët kushtuar Kongresit të Drejtshkrimit, shkruan euronews.al.