Fillon gjykimi ndaj shqiptarit që vrau me çekan 19-vjeçarin

I pandehuri e ka joshur nëntëmbëdhjetëvjeçarin në një liqe peshkimi dhe atje e ka goditur disa herë në kokë me çekan

Para Gjykatës së Ulmit në Gjermani, nga e hëna do të duhet të përgjigjet një shqiptar 46-vjeçar, i cili “nga gjakmarrja” ka vrarë me çekan një shqiptar tjetër 19-vjeçar.

Prokuroria e akuzon atë se viktimën e tij e ka vrarë “në mënyrë tinëzare dhe për motive të ulëta” në muajin maj të vitit të kaluar.

I pandehuri e ka joshur nëntëmbëdhjetëvjeçarin në një liqe peshkimi dhe atje e ka goditur disa herë në kokë me çekan.

Shqiptari i akuzuar, i cili ka shtetësi gjermane dhe me vendbanim të fundit në Göppingen, i mohon akuzat, ndërsa prokurori po përpiqet që përmes gjurmëve të ADN-së dhe dëshmitarëve ta argumentojë krimin, shkruan “TAG24”, përcjell Albinfo.ch.

Sipas të dhënave të tij, pas hetimeve të shumta, në mesin e të cilave edhe atyre nga Evropa Juglindore, ai ka konstatuar se “bëhet fjalë për një vrasje në shenjë gjakmarrje, rrënjët e së cilës datojnë nga viti 2000, kur në Shqipëri ishte kryer një vrasje”. Viktima 19-vjeçare, e cila për herë të fundit ka jetuar në Steinfurt (Nordrhein-Westfalen), ka qenë nipi i autorit të atëhershëm.

Për procesin gjyqësor, deri në verë janë paraparë tetë seanca, ndërsa Gjykata ka rezervuar edhe 25 ditë të tjera. Shqiptimi i vendimit pritet të sillet nga muaji janar i vitit të ardhshëm.