FFK heton pretendimet për kurdisje të ndeshjeve

Foto - FFK facebook

Federata e Futbollit të Kosovës përmes një sqarimi ka bërë të ditur se do të trajtojë me seriozitet pretendimet për kurdisjen e një ndeshje mes Mitrovica – EP Hajvalia në kategorinë e femrave.

“Federata e Futbollit e Kosovës së fundi është njoftuar nga mediat rreth pretendimeve për tentim kurdisjen e një ndeshje të mëhershme në futbollin e femrave, ndërmjet dy ekipeve KFF Mitrovica dhe KFF EP Hajvalia.

“Tashmë çështja është adresuar te organet dhe komisionet përkatëse brenda Federatës, të cilat janë duke mbledhur informacionet dhe dokumentacionet e nevojshme lidhur me këtë rast, e të cilat do të shqyrtohen me përpikëri. Gjithashtu, këtë rast e kemi adresuar edhe tek Këshilli Kombëtar për Parandalimin dhe Sanksionimin e Dhunës dhe Dukurive Negative në Ngjarjet Sportive për të proceduar më tutje”, thuhet mes tjerash në sqarim.

FFK siguron që pretendimet dhe dyshimet që lidhen me këtë rast do të trajtohem me seriozitetin më të madh nga organet në aspektin disiplinor, ndërsa në aspektet e tjera do të merren organet shtetërore të Republikës së Kosovës.