Edhe një shqiptar nga Zvicra i bashkohet Kosovës

Për herë të parë pritet të grumbullohet edhe Arijanet Muriq i Manchester Cityt, i cili gjithashtu ka lindur në Zvicër

Numri i futbollistëve shqiptarë nga Zvicra që po luajnë për Kosovën po rritet nga dita në ditë.

Sipas mediave kosovare, i fundit që pritet t’i bashkohet Kosovës është Mirlind Kryeziu, i cili luan në Zurich, shkruan albinfo.ch.

Trajneri zviceran, Bernard Challandes e ka ftuar qendërmbrojtësin për dy ndeshjet e radhës në muajin nëntor.

Kosova fillimisht do të luajë në udhëtim te Malta më 17 nëntor, ndërsa pas tri dite në stadiumin “Fadil Vokrri” pret Azerbajxhanin, ku do të vendoset për vendin e parë në grup.

Ai është vetëm 21-vjeçar, por shihet me të ardhme të ndritur. Kryeziu ka luajtur për grupmoshat e Zvicrës nga U-16 deri më U-20.

Ai ka lindur në Cyrih, derisa prindërit e tij janë nga Kosova.

Për herë të parë pritet të grumbullohet edhe Arijanet Muriq i Manchester Cityt, i cili gjithashtu ka lindur në Zvicër.

Nga Zvicra janë edhe Benjamin Kololli, Hekuran Kryeziu, Arbenit Xhemajli dhe Idriz Voca.

---