Dokumentar i vitit 1981 mbi ardhjen e gastarbajterëve nga Kosova në Zvicër

"Shumica që vijnë, këtë e bëjnë nga halli sepse nuk kanë pasur ndonjë zgjidhje tjetër mbijetese"

Pamja e parë hapet me një grup të rinjsh shqiptarë nga Kosova, të posaardhur në Zvicër, duke kënduar këngë folklorike me çifteli. Kështu fillon një dokumentar i realizuar nga televizioni zviceran SRF në vitin 1980, që bën fjalë mbi ardhjen në Zvicër të “gastarbajterëve” nga Kosova.

Ata, dokumentari zviceran i prezanton si “punëtorë sezonierë, të ardhur nga Jugosllavia”, kryesisht nga viset jugore, më të varfra të këtij vendi. “Shumica që vijnë, këtë e bëjnë nga halli sepse nuk kanë pasur ndonjë zgjidhje tjetër mbijetese”, vëren gazetari zviceran.

Ekipi filmik i ka shoqëruar ata që nga mbërritja në stacionin hekurudhor në Buchs (SG), shkruan albinfo.ch. Në këtë qytet, që është pika e parë e hyrjes në Zvicër, me të zbritur nga treni, ata i pret kontrolli shëndetësor.

Më tutje, disa nga gastarbajterët e ardhur flasin për motivet që i kanë shtyrë të mërgojnë dhe për kushtet që i presin në Zvicër. Njëri prej tyre thotë se këtu ndihet sikur në burg, për faktin se i është dashur të largohet nga familja, të cilën nuk do ta shohë për 9 muaj të gjatë, transmeton albinfo.ch. Ai dhe shqiptarët tjerë të intervistuar, ankohen për kushtet e rënda të punës dhe sidomos  për statusin jo të lakmuar që kishin punëtorët sezonierë.

“Të kishim punë të rregullt vjetore, të paktën, që të mos rrimë në ethe për tre muaj të tërë se a do të na thërrasin apo jo”, shprehet një i intervistuar tjetër.

Intervistimi është realizuar në gjuhën serbokroate me përkthim në gjermanishte, për arsye që dihen.

Për më tepër, shikojeni dokumentarin.

---