Diplomacia kosovare pa ndikim në çështjet e sigurisë

Sulmi i huliganëve serbë ndaj Ambasadës së Kosovës në Paris, në përvjetorin e tretë të pavarësisë, ka ngritur edhe njëherë dilemat në lidhje me mjaftueshmërinë e masave të ndërmarra nga Ministria e Punëve të Jashtme (MPJ) për sigurimin e përfaqësive diplomatike, por edhe për të vënë në pyetje kontributin e këtij dikasteri qeveritar në forcimin e sigurisë kombëtare.

Përqendrimi i MPJ-së në lobimin për njohje ka bërë që shumë aspekte të shumta që lidhen me sigurimin e diplomatëve, qytetarëve por edhe të vetë shtetit të Kosovës të mbesin jashtë vëmendjes së duhur të këtij institucioni.

Njohësit e çështjeve të sigurisë dhe analistët për Kohën Ditore kanë vlerësuar se ndikimi i diplomacisë kosovare në sigurinë kombëtare ka qenë minimal për shkak se kjo përgjegjësi është aktualisht në duart e paqeruajtëse ndërkombëtarë.

Zyrtarë të MPJ-së dhe diplomatë kanë pohuar se, në bazë të konventave ndërkombëtare, misionet diplomatike të Kosovës kanë kërkuar ofrimin e sigurisë nga shtetet nikoqire, derisa të gjitha angazhimet e diplomacisë shkojnë në drejtim të forcimit të sigurisë kombëtare, frytet e të cilës janë parë gjatë evakuimit e qytetarëve të Kosovës nga vendet e krizës, muajt e fundit.