Dënohen dy kurdë në procesin “Al Kaida”

Fjala është për dy kurdë nga Iraku. I akuzuari kryesor ka marrë një dënim prej tri vitesh burg ndërsa tjetri, vëllai i tij më i ri është dënuar me dy vite burg me kusht

Gjykata Federale Penale e Zvicrës, me seli në Bellinzona, në procesin e njohur si “Procesi Al Kaida” ka dënuar dy vëllezër kurdë nga Iraku për veprimtari terroriste. I akuzuari kryesor ka marrë një dënim prej tri vitesh burg ndërsa tjetri, vëllai i tij më i ri është dënuar me d vite burg me kusht.

Dy vëllezërit, njëri 35 dhe tjetri 28 vjeçar janë gjetur fajtorë për mbështetjen e një organizate kriminale, thuhet në arsyetimin e dhënë nga gjykata me rastin e shqiptimit të dënimit. Prokuroria kishte kërkuar katër vjet e nëntë muaj burg për të parin dhe tre vjet për të dytin, prej të cilave një vjet burg me kusht.

Nga ana tjetër, mbrojtja e dy vëllezërve kishte kërkuar lirimin e tyre nga akuza. Sipas saj, mungojnë dëshmi për planifikim të delikteve të dhunshme ndërsa grupimi për të cilin ata akuzohen “Zentrum Didi Nwe Auslandsabteilung” se e kanë mbështetur nuk është organizatë kriminale.

Dy kurdët tashme të dënuar, më parë kishin fituar azil në Zvicër dhe kanë jetuar në Bazel. Nga vendqëndrimi i tyre ata, siç është konstatuar në procesin gjyqësor, kishin shpërndarë material propagandistik për organizatë terroriste Al-Kaida.