DASH kërkon “përmbushje urgjente të detyrimeve” nga Kurti dhe Vuçiq

Shtetet e Bashkuara të Amerikës, duke komentuar takimet e fundit të kryeministrit të Kosovës, Albin Kurti dhe presidentit të Serbisë, Aleksandar Vuçiq, me liderët evropianë, i kanë bërë thirrje Kosovës dhe Serbisë që urgjentisht dhe seriozisht të angazhohen për përmbushjen e detyrimeve që dalin nga dialogu që po zhvillojnë, shkruan albinfo.ch.

Në një përgjigje për VOA nga Departamenti Amerikan i Shtetit, bëhet e ditur se SHBA mirëpret takimet e zhvilluara për të avancuar procesin e normalizimit.

“I mirëpresim takimet e zhvilluara për të avancuar procesin e normalizimit. Ne vazhdojmë të mbështesim fuqishëm dialogun ndërmjet Kosovës dhe Serbisë, me ndërmjetësimin e Bashkimit Evropian, si e vetmja mënyrë që do të sigurojë marrëdhëniet e tyre paqësore dhe produktive dhe do të përmbushë aspiratat e tyre për anëtarësim në bllok”, thuhet nga DASH.