Coop do të hapë dyqanin e 1,000-të vitin e ardhshëm

Në fund të vitit 2024, COOP kishte 970 supermarkete dhe gjeneroi shitje prej 12.1 miliardë frangash zvicerane

Sipas një raporti të publikuar në “Le Temps”, Coop planifikon të hapë dyqanin e vet të 1,000-të vitin e ardhshëm. Pavarësisht një rrjeti tashmë të dendur dyqanesh, CEO i kompanisë COOP, Philipp Wyss sheh potencial të mëtejshëm rritjeje në Zvicër “sepse popullsia po rritet”, tha ai në një intervistë, transmeton albinfo.ch.

Në fund të vitit 2024, COOP, që është shitësi i dytë më i madh me pakicë në Zvicër kishte 970 supermarkete dhe gjeneroi shitje prej 12.1 miliardë frangash zvicerane.

“Sektori ushqimor ka performuar mirë për vite me radhë dhe ne po fitojmë gradualisht pjesë të tregut atje”, tha ai në intervistën e publikuar të shtunën.

Kompania po përjeton gjithashtu rritje pozitive në sektorin jo-ushqimor – pavarësisht konkurrencës së fortë nga shitësit me pakicë online, përcjell albinfo.ch. Coop ka përfituar gjithashtu nga ristrukturimi i konkurrentit të saj kryesor, Migros.

Paralelisht me zgjerimin e rrjetit të dyqaneve të saj, Coop synon të forcojë shitjet online dhe të integrojë më nga afër të dy kanalet e shitjes. “Ky kombinim është thelbësor”, tha Wyss. “Ne kemi zbuluar se klientët tanë më të mirë online dhe offline janë të njëjtë.”

Lidhur me blerjet e mundshme, Drejtori Ekzekutiv i Coop shpjegoi se ata po kërkojnë objektiva të përshtatshëm, “por tregu është mjaft i ngopur”. Prandaj, rritja në të gjitha segmentet e çmimeve është përparësia.

---