Calmy-Rey: Zvicra duhet të hyjë në BE

"Duket më e arsyeshme hyrja e Zvicrës si anëtare me të drejta të plota në BE se sa marrëveshjet bazë e cila përcakton raportet në mes të Zvicrës dhe Bashkimit Evropian. "

Ish ministrja e punëve të jashtme e Zvicrës Micheline Calmy-Rey është paraqitur serish në medie pas një heshtjeje relativisht të gjatë. Ajo javën tjetër do të bëjë promovimin e një libri të saj të ri që bën fjalë për kohën e saj si ministre e jashtme dhe ku ajo shtjellon idetë e saj politike.

Në paraqitjet e para që ka pasur ajo (ditë më parë në magazinën televizive 10vor10” dhe sot në “Sonntagszeitung”) ka kërkuar që të zhvillohen bisedime për hyrjen e Zvicrës në Bashkimin Evropian. Sipas ish kryediplomates zvicerane, aktualisht duket më e arsyeshme hyrja e Zvicrës si anëtare me të drejta të plota në BE se sa marrëveshjet bazë e cila përcakton raportet në mes të Zvicrës dhe Bashkimit Evropian.

Në një rast të tillë Zvicra do të fitonte më tepër ndikim, ka sqaruar ajo qëndrimin e saj në një intervistë të cilën sot e ka botuar gazeta “SonntagsZeitung”. Sipas Calmy Re, Evropa po kërkon nga Zvicra që për të hyrë në tregun e përbashkët evropian duhet t`i pranojë normat e saj. Ndërkaq, vetëm si anëtare, Zvicra do të mund të ndikonte në rregullat në fjalë.

Duke shfaqur këtë qëndrim, ish ministrja e jashtme e Zvicrës është vënë në pozita të kundërta me strategjinë e Këshillit Federal.