Britania kërkon lehtësimin e ndihmave për Gazën

Londra i bën thirrje Izraelit të heqë pengesat dhe të mundësojë hyrjen e më shumë ndihmave humanitare

Mbretëria e Bashkuar i ka bërë thirrje Izraelit që të lejojë hyrjen e sa më shumë ndihmave humanitare në Gaza dhe të heqë pengesat që po vështirësojnë shpërndarjen e tyre.

Ministri britanik për Lindjen e Mesme, Stephen Doughty, e bëri këtë thirrje gjatë një vizite në el Arish të Egjiptit, duke theksuar nevojën që ndihmat të arrijnë në Gaza sa më shpejt dhe në mënyrë të sigurt, përcjell albinfo.ch.

Ai kërkoi që të mundësohet hyrja e sasive më të mëdha të ushqimit, barnave dhe furnizimeve të tjera bazë për popullsinë civile.

Britania ka përsëritur ditët e fundit kërkesën që Izraeli të lehtësojë hyrjen e ndihmave dhe të mundësojë shpërndarjen e tyre në përmasa që përputhen me nevojat humanitare në terren.

Situata në Gaza mbetet e rëndë, ndërsa organizatat humanitare vazhdojnë të kërkojnë qasje më të gjerë dhe më të sigurt për furnizimin e civilëve.

---