Kosova

Bilanci aktual me Covid në Kosovë, Shqipëri dhe në Maqedoni

Që nga fillimi i pandemisë në Kosovë me Covid-19 janë infektuar rreth 60 mijë persona. Prej tyre 1,492 kanë humbur jetën, ndërsa mbi 52 mijë janë shëruar, kurse numri i rasteve aktive është 6 mijë e 231.

Në njoftimin e fundit të Institutit Kombëtar të Shëndetësisë Publike të Kosovës, numri total i rasteve pozitive është 59,931, nga 231,094 persona të dyshimtë në virusin SARS-CoV-2 dhe 1,492 raste të vdekjes.

Në raportin e së shtunës thuhet se gjatë 24 orëve të fundit janë shëruar 260 pacientë, derisa numri i përgjithshëm i të shëruarve deri më sot është gjithsej 52,208 raste, kurse numri i rasteve aktive është 6,231.

Nga ana tjetër, në 24 orët e fundit në Shqipëri janë konfirmuar pozitive 901 raste të reja dhe 11 humbje jete. Në 4 spitalet COVID po trajtohen 287 pacientë, 20 në terapi intensive, nga të cilët 4 pacientë janë të intubuar. Lajmi i mirë mbete fakti se betejën me COVID-19 e kanë fituar në 24 orët e fundit 507 qytetarë.

Ndërkohë, Maqedonia Veriore, në 24 orët e fundit kishte 325 raste të reja të regjistruara, 151 prej të cilëve në Shkup, 27 në Tetovë dhe 17 në Kavadar.

Nga ana tjetër, numri i të shëruarve është më i lartë, pasi 479 pacientë fituan betejën ndaj COVID-19.