Berisha thërret sërish Shqipërinë

“Nëse më ftojnë jam i gatshëm të luaj për Shqipërinë. Nëse jo, iu dëshiroj fat”, deklaroi Berisha

Sulmuesi prishtinas, Besart Berisha ka bërë të ditur edhe një herë se është i gatshëm të luajë për Shqipërinë, nëse në drejtim vjen ftesa, shkruan albinfo.ch.

Berisha që pesë vite luan në Australi dhe është shumë i kënaqur. “Jam që pesë vite këtu dhe po e shijoj çdo moment prej kur kam ardhur. Nëse mund të marrë pasaportën do ta marrë. Mendoj se të jesh australian është mirë”, ka deklaruar sulmuesi prishtinas për mediat australiane.

Gjatë verës zhvillohet Kampionati Evropian dhe Shqipëria është kualifikuar për herë të parë. Ai ka 17 paraqitje me Shqipërinë, por nuk ka luajtur prej kur është transferuar në Australi, për shkak të largësisë së madhe.

“Nëse më ftojnë jam i gatshëm të luaj për Shqipërinë. Nëse jo, iu dëshiroj fat”, deklaroi 30-vjeçari, i cili ëndërron të fitojë Ligën e Kampionëve të Azisë me skuadrën e tij Melbourne Victory.