Berisha: Po bëjmë gjithçka që procesi i votimit nga diaspora të jetë transparent

Kryetari i Partisë Demokratike, Sali Berisha, ka deklaruar se po ndërmerren të gjitha masat për të siguruar një proces transparent për regjistrimin e diasporës në prag të zgjedhjeve, përcjell albinfo.ch.

“Ne po bëjmë gjithçka që ky të jetë një proces transparent dhe deri tani hapat e ndërmarrë kanë qenë të tillë,” tha Berisha, duke theksuar se Partia Demokratike po ndjek me kujdes çdo zhvillim.

Berisha iu përgjigj interesit të qytetarëve dhe u bëri thirrje emigrantëve që të vizitojnë uebsajtin e PD-së, ku ndodhet nënfaqja “Diaspora Voton,” për t’u regjistruar shpejt dhe lehtë.

“Ne po përpiqemi në mënyrë të përditshme të informojmë qytetarët. Kemi krijuar një faqe të veçantë që kërkon vetëm 30 sekonda kohë për të marrë udhëzimet e plota për regjistrimin në platformën e KQZ-së,” tha Berisha.

Ai shtoi se përmes kësaj nisme, çdo qytetar shqiptar në diasporë mund të marrë automatikisht informacionin e nevojshëm për të plotësuar procesin e regjistrimit.

“Mendoj se kjo është forma më e sigurt dhe më e shpejtë për t’ju informuar,” përfundoi Berisha, duke nënvizuar rëndësinë e pjesëmarrjes së diasporës në proceset zgjedhore.