Bendriti, mysafir në emisionin numër një të humorit zviceran”Giacobbo&Müller”

Para kësaj, ai do të ketë paraqitjen e tij të parë live në spektaklin "Swiss Nightlife Awards" që mbahet më 7 shkurt

„Ti je shqiptar nëse…“, batutat që fillojnë me këtë fjali dhe që i njohim nga mediet sociale apo tensionet dhe dallimet kulturore në mes të shqiptarëve, të huajve tjerë dhe zviceranëve janë baza mbi të cilën Bendriti ndërton humorin e tij. Ky humor që ai e poston në youtube dhe në fb ka zënë të pëlqehet jashtëzakonisht shumë. Ai është bërë yll në mesin e moshatarëve të tij. Filmimet që i bën Bendriti marrin dhjetëra mijë “like” dhe bëhen temë bisedash e shakash në oborret e shkollave të nesërmen pasi janë publikuar.

albinfo.ch i ka bërë Bendritit një prezantim para disa muajsh dhe ndërkohë fama e tij ka ardhur duke u rritur në vazhdimësi. Gazetat dhe mediet elektronike e prezantojnë artisin e ri shumë shpesh, duke i parashikuar një karrierë të bujshme artistike.

Por fama e tij tashmë ka kaluar rrethin e moshatarëve të tij. Një befasi e këndshme ka qenë për Benin kur, para pak ditësh i ka ardhur ftesa nga televizioni publik zviceran. Ai ftohej të merrte pjesë në emisionin më të shikuar humoristik-satirik të Zvicrës “Jacobo&Müller”. Bendriti e pranon se kjo ftesë i ka ardhur fare e papritur dhe e nderon atë. Në këtë emision Bnin do ta shohim këtë të diele, nga ora 22.10.

Para kësaj, ai do të ketë paraqitjen e tij të parë live në spektaklin “Swiss Nightlife Awards” që mbahet nesër, më 7 shkurt.

Më shumë se 160 mijë shfrytëzues të fb kanë tashmë abonimin e tij. Ato që i poston ylli i ri nga Cyrihu, shikohen nga gjysmë milioni njerëz. Janë shqiptarë por edhe zviceranë dhe të tjerë, kryesisht të rinj, ata që e gjejnë veten në këto video. Fama e tij ka depërtuar edhe në Gjermani e në Austri, ku fansat i kërkojnë që mundësisht të postojë edhe video në gjermanishten letrare (hochdeutsch).

Ndërkohë Bendrit Bajra, 19 vjeç, që jeton në Schwamendigen të Cyrihut është bërë shumë i popullarizuar. Aq shumë sa që nuk mund të dalë për të bërë shoping pa u ndaluar dhe përshëndetur nga dhjetëra të rinj e të reja. Por, atij i pëlqen ky popullaritet. Pasi që këtë vit ta përfundojë shkollën e mesme ai mendon t`i kushtohet plotësisht artit.