Bendi “Pablo Infernal” i rokerit shqiptar, promovon albumin e ri

«Lightning Love» është titulluar albumi i “Pablo Infernal”, që do të promovohet në një mbrëmje speciale të rokut, të premten në Winterthur

Bendi „Pablo Infernal“ i këngëtarit shqiptar Altin Asllani do të promovojë albumin, të premten mbrëma nga ora 20:00, në Haus Helvetia, Wildbachstr. 2, Winterthur.

«Lightning Love» është titulluar albumi i “Pablo Infernal”, që do të promovohet në një mbrëmje speciale të rokut, të premten në Winterthur.

Për Bendin e Altin Asllanit do të dëgjoni më shumë sonte nga ora 20:00 në Radio SRF3, e cila po i jep një publicitet të theksuar daljes së albumit.

http://www.srf.ch/sendungen/rock-special/pablo-infernal-spaet-geboren

Për herë të parë këngëtari i rok grupit është paraqitur para publikut si solist më 2008, kur ishte vetëm 13 vjeç. Nga dëshira për të kultivuar zhanrin e muzikës rok, ai krijon grupin e tij „Pablo Infernal“ bashkë me tre shokë të tij.

“Pablo Infernal” është zgjedhur bendi më i mirë i rokut  për vitin 2013 në “Rock Highway Contest” në Zürich në një konkurrencë të më se 50 rok bendeve të ndryshme nga Zvicra. Më pas kanë luajtur në koncerte të shumta, e që vlen të përmendet performimi vitin e kaluar në programin hyrës të koncertit të madh Open-Air të AC/DC para më shumë se 100 mijë shikuesve në Austri si dhe pjesëmarrja këtë vit në “New Sound Festival” në Vjenë.

Të gjitha këngët i kanë shkruar vetë. Albumi i bendit shqiptaro-zviceran „Pablo Infernal“ do të jetë në shitje nga e kjo e premte në të gjitha pikat e shitjes së mediave në Zvicër, Gjermani e Austri, si dhe në platformat online si iTunes, Spotify, Amazon etj.

Shqiptari me origjinë nga Presheva është dhënë shumë pas muzikës. Ai përveç rokut, e do edhe muzikën klasike. Altini luan për mrekulli edhe në piano. Ai është edhe student i muzikës në Universitetin e Zürichut.