BE pret formimin e shpejtë të institucioneve të reja në Kosovë

Bashkimi Evropian u shpreh se pret konstituimin e shpejtë të Kuvendit dhe krijimin e Qeverisë së re të Kosovës pas zgjedhjeve të 28 dhjetorit, në të cilat Lëvizja Vetëvendosje e Albin Kurtit arriti fitore të qartë.

Në një deklaratë të përbashkët, përfaqësuesja e lartë e BE-së, Kaja Kallas, dhe komisionarja për Zgjerim, Marta Kos, theksuan nevojën që qeveria e re të përqendrohet tek reformat e lidhura me procesin e integrimit evropian.

BE-ja vlerësoi gjithashtu pjesëmarrjen e partive nga të gjitha komunitetet, duke e cilësuar si një dëshmi të angazhimit ndaj parimeve demokratike. Ajo i bëri thirrje Kuvendit që të ratifikojë marrëveshjet që lidhen me Planin e Rritjes, duke përfshirë investime mbi 800 milionë euro nga paketa evropiane prej rreth 6 miliardë eurosh për Ballkanin Perëndimor.

Dy zyrtarët e BE-së nënvizuan gjithashtu rëndësinë e dialogut Kosovë-Serbi, ndërmjetësuar nga Brukseli, duke e cilësuar si rrugën kryesore për përparim drejt BE-së. Sipas marrëveshjes së vitit 2023, palët duhet të respektojnë detyrimet për normalizim, përfshirë të drejtat e komunitetit serb dhe njohjen e simboleve shtetërore.