BE-ja heq tarifat e roamingut, por jo edhe me Zvicrën

Nga 15 qershori evropianët telefonojnë me njëri-tjetrin pa paguar tarifat e roamingut. Zviceranët ende duhet të presin dhe të paguajnë tarifa të larta roaming, shkruan albinfo.ch.

Të gjithë operatorët e telekomunikacionit në BE duhet t’u ofrojnë klientëve të tyre një kontratë, e cila nuk ka kosto shtesë për internet ose thirrje jashtë vendit.

Për ta bërë këtë të mundur, Parlamenti Evropian ka negociuar kufizimin e çmimeve roaming për 10 vjet. Tashmë është rregulluar që tarifat operatorët duhet t’ia paguajnë njëri-tjetrit kur klientët e tyre të kenë qasje në një rrjet të huaj. Kjo është gjithashtu për të parandaluar kompanitë e telekomit të kompensojnë humbjen e të ardhurave roaming thjesht me çmime më të larta të abonimit.

Vendet e Eurozonës, si Islanda, Norvegjia dhe Lihtenshtajni, gjithashtu përfshihen në këtë marrëveshje, por jo edhe Zvicra.

Operatorët zviceranë, sipas srf, nuk do të përfitonin nga tarifat fikse të BE-së, por do të duhej të negociojnë çmimet roaming individualisht në kuadër të negociatave dypalëshe me operatorët evropianë.

Ministrja zvicerane, Doris Leuthard, është përgjigjur në një pyetje parlamentare se në kuadër të rishikimit të ligjit për telekomunikacionin po shqyrtohen masa të ndryshme kundër tarifave të larta roaming në mënyrë joproporcionale. Megjithatë, rezultatet e shqyrtimit të ligjit të telekomunikacionit duhet të priten deri në vjeshtë.

Qytetarëve zviceranë u mbetet të blejnë një sim kartelë në çdo vend të BE-së, në mënyrë që ata të mund të lëvizin lirshëm në kushtet e vendit përkatës në gjithë Evropën.