Barnat mbeten të shtrenjta në Zvicër

Si çdo produkt tjetër, ashtu edhe derivatet e naftës, rrobat, kozmetika që nga heqja e kufizimeve të frangut ndaj euros janë më të lira në Zvicër, përveç medikamenteve. Qeverisë i duhen tre vjet për t’i llogaritur çmimet e reja të të gjitha barnave.

Euro ka rënë kohët e fundit me 15 për qind, por çmimet e barnave nga zona e euros nuk kanë lëvizur. Madje nuk pritet shpejt të ndryshojnë. Rregullatori i çmimeve ka kritikuar. “Medikamentet janë me çmime në bazë të rregulloreve dhe janë fikse për tre vjet”.

Zyra Federale e Shëndetit Publik ridefinon për çdo vit çmimet e një të tretës së të gjitha barnave. Derisa të gjitha barnat të rregullohen në bazë të normave të reja të këmbimit duhet kohë deri në tre vjet.

Megjithatë në industrinë farmaceutike janë kundër rregullimit të çmimeve në një periudhë më të shkurtër. Industria farmaceutike prodhon jo vetëm për tregun vendës, por për pjesën më të madhe për eksport. Edhe ata kanë telashe me frangun e fortë, sepse produktet e tyre tani janë shumë më të shtrenjta për eksport, thotë për SRF Thomas Cueni nga shoqata e industrisë „Inter Pharma”.