Aplikimi për anëtarësim në BE, shtetet e para që shprehën mbështetje për Kosovën

EPA/OLIVIER HOSLET

Krerët e shtetit të Kosovës të mërkurën nënshkruan aplikimin për anëtarësimin e Kosovës në Bashkimin Evropian, në një ceremoni zyrtare të organizuar në ambientet e Presidencës së Kosovës, ndërkaq të enjten në Pragë kryeministri i vendit, Albin Kurti, ia dorëzoi aplikimin e Kosovës zyrtarëve të Republikës së Çekisë, shtet ky që kryeson Presidencën e Këshillit të BE-së, përcjell albinfo.ch.

Në Pragë Kurti është pritur nga ministri për Çështje Evropiane i Çekisë, Mikulas Bek, me të cilën kanë biseduar për procesin e integrimit të Kosovës, çështjen e liberalizimit të vizave dhe zhvillimet e tjera.

E mbështetja e parë për Kosovën për këtë hap erdhi nga vetë shteti i Çekisë që deri në fund të dhjetorit kryeson me Presidencën e Këshillit të BE-së.

Ministri Bek tha se është nder për të që të pranojë aplikimin e Kosovës për anëtarësim në BE.

Ai ka theksuar se Presidenca çeke në 6 muajt e fundit i ka vënë vëmendje të jashtëzakonshme Ballkanit Perëndimor.

“Është nder për mua si kryetar i Këshillit të BE-së të pranoj aplikacionin e Kosovës. Na vjen mirë që kemi arritur të avancojmë tutje çështjen e liberalizimit të vizave për Kosovën. Na vjen mirë që është arritur konsensus Këshilli me Parlamentin Evropian për këtë çështje. Është kënaqësi e jashtëzakonshme…”, ka thënë Bek, duke shtuar shteti i tij e mbështet Kosovën drejt rrugës evropiane.

E në ditën kur Kosova dorëzoi aplikimin për anëtarësim në BE, mbështetje erdhi nga Shqipëria, Kroacia, Mali i Zi, Finlanda, Estonia etj.

Presidenti i Republikës së Shqipërisë, Bajram Begaj, aplikimin e Kosovës për anëtarësim në BE e konsideroi akt të rëndësishëm historik, ndërkaq autoriteteve të Kosovës u uroi suksese në përmbushjen e detyrimeve të procesit të anëtarësimit.

Ai u bëri thirrje të gjitha vendeve anëtare që ta mbështesin aplikimin e Kosovës, pasi kjo do të ishte jo vetëm në interesin më të mirë gjeopolitik të Bashkimit Evropian, por dhe një kontribut më shumë në mbështetje të një vendi e një populli me vokacion të qartë evropian dhe euro-atlantik.

“Urime Kosovë e shumë suksese!”, u shpreh Begaj.

Mbështetje të enjten për Kosovën erdhi edhe nga kryeministri i Kroacisë, Andrej Plenkoviç.

Përmes një postimi në rrjetet sociale, ka përshëndetur këtë hap që ka bërë Kosova dhe ka premtuar ndihmë nga përvoja që ka pasur Kroacia në rrugën drejt anëtarësimit.