Ammann: Nuk ka indikacione rreziku për Zvicrën

Presidenti  i Federatës së Zvicrës, Johann Schneider-Ammann ka deklaruar se, bazuar në informacionet në dispozicion, aktualisht nuk ka rrezik për sulme eventuale terroriste në Zvicër. Ammann ka dhënë këtë deklaratë në kontekstin e sqarimit të situatës në vend pas sulmeve terroriste që ndodhën sot në Bruksel.

Presidenti në një konferencë për medie të mbajtur sot në Bernë i ka shprehur ngushëllime popullit belg dhe ka dënuar aktet terroriste që kanë ndodhur në kryeqytetin e Belgjikës.

«Ne bashkëndjejmë me Belgjikën dhe dënojmë në mënyrën më të ashpër këto akte të tmershme», është shprehur ai.

Ammann po ashtu ka thënë se aktualisht nuk ka informacione për viktima eventuale zvicerane dhe se po ashtu nuk ka indikacione për rrezikim të drejtpërdrejtë të Zvicrës.