Ambasadori amerikan kujton ditën kur SHBA-ja njohu shtetin e Kosovës

Ambasadori i Shteteve të Bashkuara të Amerikës në Kosovë, Jeffrey Hovenier, ka kujtuar 18 shkurtin e vitit 2008, ditën kur SHBA-ja njohu shtetin e pavarur dhe sovran të Kosovës.

SHBA-ja e njohu Kosovën më 18 shkurt, vetëm një ditë pas shpalljes së pavarësisë.

Ambasadori amerikan kujton 18 shkurtin e 2008-së, gjersa thekson se janë krenarë për mbështetjen dhe të frymëzuar nga demokracia në Kosovë.

“Këtë Ditë të vitit 2008, Shtetet e Bashkuara e njohën zyrtarisht Kosovën. 15 vjet më vonë, ne jemi krenarë për mbështetjen tonë dhe të frymëzuar nga demokracia ka arritur populli i Kosovës”, shkruan ambasadori amerikan në Twitter, të cilës ia ka bashkëngjitur një kolazh me fotografi të ngjarjeve kryesore dhe takimeve ndërmjet zyrtarëve amerikan e nga Kosova.

“Gëzuar Ditën e Pavarësisë, Kosovë! Kam pasur privilegjin dhe nderin të jem pjesë e historisë sonë të përbashkët, duke parë Kosovën duke bërë hapa të mëdhenj gjatë 15 viteve të fundit. Shtetet e Bashkuara janë krenare për mbështetjen e hershme dhe të qëndrueshme dhe për partneritetin me popullin kosovar, derisa ky vend i ri e merr vendin e saj në strukturat evropiane, euro-atlantike dhe ndërkombëtare”, ishte shprehur të premten ambasadori Hovenier.

“Kemi qenë me ju prej fillimit dhe partneriteti ynë mbetet i fortë si guri”, thotë ndër të tjera ambasadori.