Ambasada e Kosovës njofton për gjetjen e dy fëmijëve të humbur kosovarë

Dy fëmijët kosovarë, Leotrimi 13 dhe Qëndrimi 11 vjeçar, nga lokaliteti Borsdorf në afërsi të Leipzigut, të cilët që nga e enjtja, 19 prill konsideroheshin si të zhdukur, janë gjetur. Këtë njoftim, sipas televizionit “T7” (të gazetaexpress) e bën Ambasada e Republikës së Kosovës në Gjermani, pa dhënë hollësi të mëtutjeshme.

Ata ishin shpallur të humbur nga mëngjesi i të enjtes, 19 prill (ora 6), kur për herë të fundit janë parë në qendrën e strehimit ku banojnë me familjen, shkruan tag24.de.

Dy vëllezërit ishin nisur për të shkuar në shkollë, ka infomuar nëna e tyre por, në shkollë nuk kanë arritur, transmeton albinfo.ch. Siç bën të ditur policia, Leotrimi dhe Qëndrimi nuk kanë shokë në qytezën Borsdorf ku banojnë dhe as ndonjë pikë ose shtëpi në rrethinë ku mund të pritej që të shkonin.