Ambasada e Kosovës në Gjermani reagon për dy fëmijët e humbur

Më herët ashtu siç ka informuar edhe albinfo.ch, dy të miturit ishin nisur për në shkollë, por nuk mbërritën kurrë

Ambasada e Republikës së Kosovës në Gjermani ka konfirmuar se ka pranuar informatën se dy fëmijë kosovarë që jetojnë atje kanë rezultuar të zhdukur.

Sipas ambasadës, janë në kontakt të vazhdueshëm me autoritetet e Policisë gjermane e cila po i kërkon fëmijët që janë humbur nga mëngjesi i së enjtes.

“Fatkeqësisht deri më tani autoritetet gjermane nuk kanë arritur t’i gjejnë 13-vjeçarin Q. N. dhe 11-vjeçarin L. N. të cilët janë nga Kosova”, thuhet në njoftimin e Ambasadës, përcjell albinfo.ch.

Më herët ashtu siç ka informuar edhe albinfo.ch, dy të miturit ishin nisur për në shkollë, por nuk mbërritën kurrë.

Policia jep përshkrimin e dy adoleshentëve për identifikimin e tyre, që mund të ndihmojë ata që eventualisht mund të hasin në dy të humburit.

Qëndrimi 13 vjeçar është i gjatë në mes 1 metër e 50 dhe 1 metër e 55.  I zbehtë, flokë të verdha (biond) dhe të shkurtra, sytë e kaltër. Ka pasur të veshur: një xhaketë (jakne) të bardhë, patika (atlete) të zeza Adidas. Flet shqip dhe gjermanishte fillestarësh.

Leotrimi 11 vjeçar është i gjatë 1 metër e 40, flokë të zezë, të shkurtë, sy ngjyrë kafe. Flet shqip dhe gjermanishte fillestarësh, transmeton albinfo.ch.

Të gjitha masat e deritashme të ndërmarra për dy fëmijët kanë dështuar, thotë një zëdhënës policie dhe lut qytetarët të japin informacione në rast se dinë ndonjë gjë rreth të humburve.