„Vatra„ u paraprin festave të nëntorit

„Vatra“ ka shfaqur të dielën një program të pasur kulturo-artistik për festat e nëntorit.

Në Höri, afer Bülach-ut, publiku të dielën kishte përjetuar një pasdite të këndshme artistike me rastin e festave të nëntorit.

Pak këngë, pak ekzekutime në violinë, recitim nga shkolla shqipe e Cyrihut, humor nga Grupi Aktrimi janë kurorëzuar me disa valle popullore nga ansambli „Vatra“.

Kryetari i ansamblit, Nexhmedin Isufi, ka mbajtur një fjalim rasti para mysafirëve të mbledhur. Manifestimin e ka përshëndetur edhe konsulli i Republikës së Kosovës, Sali Sefa dhe drejtoresha e Qendrës Kulturore të Kosovës në Zvicër, Shukrije Ramadani.

Në moderimin e aktorit Ramadan Morina, në skenë janë ngjitur këngëtarë të ardhur special nga Kosova dhe Shqipëria, si: Berat Shala, Manjolla Mace, Faton Isufi, Vjollca Haci, Emin Racaj, grupi „Djemt e Drinit“ nga Struga dhe Demir Basha.

Ansambli „Vatra“ për 20 vjet ka organizuar qindra koncerte e programe festive, duke mos i lënë anash festivalet e ndryshme që organizohen në Kosovë, Shqipëri, Maqedoni, etj.