Kosova dje, Shqipëria sot në ditë zie

Me propozim të kryeministrit Edi Rama, Qeveria e Shqipërisë ka shpallur ditën e hënë, 16 nëntor 2015, ditë zie, për në nderim të viktimave të sulmit terrorist në Paris

Një ditë pasi populli i Kosovës dhe institucionet në Prishtinë mbajtën të dielën ditë zie, në nderim të viktimave të sulmit terrorist në Paris, sot në zi është edhe populli shqiptar në Shqipëri. Me propozim të kryeministrit Edi Rama, Qeveria e Shqipërisë ka shpallur ditën e hënë, 16 nëntor 2015, ditë zie.

Në të gjitha institucionet shtetërore dhe publike do të ulet flamuri në gjysmështizë dhe në orën 12:00 do të mbahet një minutë heshtje.

Duke i dënuar me forcë këto akte terroriste, qeveria shqiptare mbetet thellësisht e angazhuar krah aleatëve të saj në luftën kundër terrorizmit, thuhet në një deklaratë të kryeministri Rama.

Ndërkaq, dje me një minutë heshtje dhe ekzekutimin e himnit francez dhe atij shqiptar, ka nisur ceremonia e homazhit e mbajtur në ambientet e Presidencës në nderim të viktimave të sulmit terrorist në Paris.

Veç diplomatëve të huaj të pranishëm në këtë ceremoni homazhi ishin: kreu i Kuvendit Ilir Meta, Guvernatori i Bankës së Shqipërisë, Gent Sejko, kreu i opozitës Lulzim Basha e shumë personalitete të tjera politike dhe kulturore në vend.

Në fjalën e tij, Presidenti i Republikës, Bujar Nishani shprehu dhe njëherë mbështetjen e plotë të Shqipërisë ndaj Francës në luftën kundër terrorizimit.

“Shpreh ngushëllimet për familjet e viktimave të akteve barbare të Parisit. Konfirmoi qëndrimin e palëkundur të Shqipërisë në aleancën për të përballuar betejën e madhe kundër terrorizmit dhunës dhe intolerancës. Shqipëria do të vazhdoi të qëndroi në krah të Francës dhe aleatëve në luftën kundër terrorizmit”, tha Nishani, citojnë mediet shqiptare.

Teksa falënderoi popullin shqiptar për solidaritetin e shprehur këto ditë me viktimat e sulmeve terroriste në Paris, ambasadori i Francës në Tiranë, Bernard Fitussi, vlerësoi edhe njëherë mbështetjen e Shqipërisë në koalicionin kundër barbarëve që shkaktuan masakrën në Paris.