Nga vallet popullore shqiptare, në “The Voice of Germany”

Dijana Jashari, vajza shqiptare nga Herzebrock-Clarholz i Gjermanisë me zërin e saj bindi jurinë e “The Voice of Germany”, për të vazhduar garën e këtij spektakli

Edhe një zë i bukur shqiptar është zbuluar në Gjermani. Dijana Jashari është prezantuar suksesshëm këtë të premte në talent shoun “The Voice of Germany” i cili transmetohet në SAT1. Vajza 19 vjeçare u prezantua me këngën “No Diggity” të Blackstreet.

Gjatë paraqitjes skenike, Dijana ishte e emocionuar ngase juria e fshehtë ishte e koncentruar në zërin e saj dhe asnjëri nga ta nuk merrte guximin të shtypte butonin.  Por, derisa kënga shkonte kah fundi, kështu nuk mendoi Andreas Bourani i cili shtypi butonin dhe ktheu shpinën për të ftuar Dijanën në grupin e tij. “Kisha tremë në skenë, por gjithçka shkoi mirë. Jam më e lumtur së kurrë”, ka thënë Dijana, njofton “albinfo.ch”.

Ajo ka treguar se prej shumë vitesh është pjesë e një grupi të valleve tradicionale shqiptare me të cilin merr pjesë në shumë koncerte kushtuar festave të ndryshme shqiptare që organizohen nga bashkatdhetarët në Gjermani.

Dijana është nxënëse e shkollës së mesme, por ëndrra e saj është të bëhet këngëtare e njohur si Beyonce. “Beyonce është idoli im. Do të toja të bëhesha e famshme dhe e njohur në muzikë si ajo”.

Dijana ka thënë se është vajzë e hapur dhe shumë e shoqërueshme.

Video: http://www.the-voice-of-germany.at/video/58-dijana-jashari-no-diggity-clip