Kuvendi i Kosovës, një vit i dështuar

Kuvendi i Republikës së Kosovës, për dhjetë muaj, ka miratuar vetëm 29 ligje, ndërsa sipas planit legjislativ, deri në fund të vitit parashihet të miratohen rreth 100 ligje

Kriza parlamentare që ka përfshirë Kosovën muajt e fundit, ka bërë që Kuvendi i Kosovës të dështojë në përmbushjen e agjendës legjislative. Brenda dhjetë muajve të këtij viti, Parlamenti ka miratuar vetëm 29 ligje, nga 100 sa kanë qenë të parashikuara në gjendjen e vitit 2015.

Pengesë të madhe në miratimin e ligjeve ka shkaktuar bllokimi i punës së Kuvendit nga ana e subjekteve opozitare. E kur kësaj bllokade i shtohet edhe ngërçi politik gjashtë mujor i vitit të kaluar, del se kjo nomenklaturë zgjedhore legjislative ka dështuar plotësisht në përmbushjen e agjendës legjislative.

Ndërkohë analistët politikë vlerësojnë se bllokimi i punës së Kuvendit do të ketë pasoja në disa aspekte për Kosovën, duke filluar nga tërheqjen e investimeve të huaja, deri të procesi i liberalizimit të vizave dhe imazhi ndërkombëtar i Kosovës, raporton “zëri”.

Ata thonë se bllokimi i Kuvendit po dëshmon se klasa politike në Kosovë është e brishtë dhe e papërvojë.

Në anën tjetër, analistët politik në Prishtinë, por edhe ish ligjvënësit kosovarë të legjislaturave të kaluara, thonë se kjo përbërje e Kuvendit të Kosovës, që është e pesat pas pavarësisë, është më e dobëta që nga sistemi pluralist në Kosovë. Kjo legjislaturë e ka degraduar maksimalisht pozitën e deputetit.

Faji për këtë i hidhet sistemit zgjedhor sipas të cilit votat e partisë gjatë zgjedhjeve janë përqendruar tek personat e preferuar të liderëve të partive, duke diskualifikuar kështu kandidatët e përgatitur për legjislativ.

Derisa në nomenklaturën e parë e të dytë legjislative kishte një numër të madh doktorë shkencash e akademikësh, tani në këtë legjislaturë, siç thonë analistët, janë kontarbanduar njerëz të ish-shërbimeve partiake, ata që janë marrë me krim të organizuar e njerëz të dëshmuar për korrupsion e shantazh.

Ndryshe, zgjedhjet e para parlamentare në Kosovën e pasluftës janë mbajtur në vjeshtën e vitit 2001, dhe nga atëherë janë organizuar pesë parë zgjedhje të lira e demokratike. Kryeparlamentari i parë i Kosovës ka qenë Nexhat Daci i pasuar nga Kolë Berisha. Më pas dy mandate i ka mbajtur Jakup Krasniqi dhe kjo legjislaturë, e pesta dhe më jofunksionale, drejtohet nga Kadri Veseli.