Juncker “ua mbledh betë” shteteve të BE-së për refugjatët

“Është e papranueshme politika e bërjes me shenjë refugjatëve që të shkojnë drejt shtetit tjetër”, shkruan në planin e prezantuar nga Juncker"

Keystone

Sot mbahet në Bruksel samiti special i BE-së lidhur me krizën e refugjatëve. Me këtë rast shefi i Komisionit të BE-së Jean-Claude-Juncker ka dalë me një plan prej 16 pikësh të cilin ua ka derguar të gjithë pjesëmarrësve në samit. Në këtë plan veç tjerash parashihet që në të ardhmen asnjëri nga shtetet anëtare të BE-së të mos e bëjë bartjen e refugjatëve nga territori i vet në shtetet tjera, kur nuk e ka pëlqimin e shtetit përkatës.

“Është e papranueshme politika e bërjes me shenjë refugjatëve që të shkojnë drejt shtetit tjetër”, shkruan në planin e prezantuar nga Juncker.

Aty parashihet që shefat e shteteve ose qeverive t`i emërojnë koordinatorët e tyre për krizën e refugjatëve në rast nevoje brenda 24 orëve. Po ashtu duhet që të dhënat mbi numrin e refugjatëve të këmbehen automatikisht në mes të shteteve përkatëse.

Në këtë samit, përveç shteteve të BE-së marrin pjesë edhe Serbia dhe Maqedonia për shkak të peshës që këto shtete po bartin të shkaktuar nga kriza e refugjatëve.