Kurti: Kosova ka presidente të re dhe institucione stabile

Kryeministri Albin Kurti ka uruar Justina Shiroka-Pulën për zgjedhjen presidente të Kosovës, duke thënë se vendi tashmë ka institucione stabile.

Kurti, përmes një postimi pas përfundimit të procesit të zgjedhjes së presidentes së re, ka deklaruar se Kosova tashmë ka një presidente dhe se institucionet e vendit janë stabile, përcjell albinfo.ch.

“Republika ka presidente të re, profesoreshën Justina Shiroka-Pula, Kosova ka institucione stabile”, ka shkruar Kurti.

Ai ka bërë të ditur gjithashtu se është miratuar ligji me ndryshime për Dhomat e Specializuara dhe Zyrën e Prokurorit të Specializuar në Hagë.

“Kemi edhe ligjin me ndryshime për Dhomat dhe Prokurorinë e Specializuar në Hagë dhe do të punojmë bashkë për suksesin e ish-krerëve të UÇK-së në apel”, ka deklaruar ai.

Kurti ka falënderuar deputetët që morën pjesë në votim, ndërsa veçanërisht ka përmendur kryetarin e PDK-së, Bedri Hamza, për pranimin e propozimit.

“Shumë mund e përpjekje, për kompromisin në fund. Për Republikën e Kosovës!”, ka shkruar Kurti.

Në fund, kryeministri ka uruar presidenten e re dhe qytetarët e Kosovës për përfundimin e procesit.

“Urime presidentes së re dhe të gjithë qytetarëve!”, ka përfunduar ai./Albinfo.ch

---