Bie niveli i ujit në Liqenin e Cyrihut

Niveli jashtëzakonisht i ulët i ujit në Liqenin e Cyrihut ka sjellë një pamje të rrallë: pranë Stäfa-s është shfaqur një ishull i vogël, i cili zakonisht ndodhet nën ujë

Sipas të dhënave të publikuara nga mediat zvicerane, niveli i Liqenit të Cyrihut ka rënë në 405.24 metra mbi nivelin e detit, një nivel historikisht i ulët.

Si rezultat, rreth 400 metra larg bregut të Stäfa-s është krijuar një sipërfaqe e vogël tokësore rreth shkëmbit të njohur si Stäfner Stein, shkruan Swissinfo.ch, transmeton albinfo.ch.

Në kushte normale, mbi sipërfaqen e ujit mund të shihet vetëm shkëmbi, ndërsa këtë herë rënia e nivelit të liqenit ka zbuluar edhe tokën përreth tij.

Ishulli nuk është i madh, por sipas raportimeve ka hapësirë të mjaftueshme që pranë tij të ankorohet një varkë e vogël dhe vizitorët të ndalen për një piknik.

Shfaqet për herë të parë pas 74 vjetësh

Fenomeni është veçanërisht interesant pasi ishulli i vogël nuk ishte parë prej 74 vjetësh. Hera e fundit që kishte dalë mbi sipërfaqen e ujit ishte gjatë një periudhe tjetër me nivel jashtëzakonisht të ulët të Liqenit të Cyrihut.

Ai ishte shfaqur gjithashtu në vitin 1909, kur niveli i ujit kishte rënë ndjeshëm. Në shkëmbin e Stäfa-s ekziston edhe një shenjë që tregon nivelin e ujit të asaj kohe, e cila tani është zbuluar sërish pas shumë vjetësh.

Shfaqja e ishullit vjen si pasojë e periudhës së thatë dhe nivelit të ulët të ujit që aktualisht po regjistrohet në liqen.

Ishulli pritet të mbetet i dukshëm edhe për një periudhë, pasi rikthimi i Liqenit të Cyrihut në nivelin normal të ujit mund të kërkojë kohë. Aktualisht nuk parashikohen periudha të zgjatura me reshje që do të mund ta ndryshonin shpejt situatën.

Pamja e pazakontë pritet ndërkohë të tërheqë edhe vizitorë kureshtarë në zonën e Stäfa-s, të cilët kanë mundësinë të shohin një fenomen që në Liqenin e Cyrihut paraqitet vetëm në periudha të rralla me nivele jashtëzakonisht të ulëta të ujit.

---