Në qytetin Bietigheim-Bissingen të Gjermanisë ka nisur mësimi plotësues në gjuhën shqipe, duke u krijuar fëmijëve shqiptarë të kësaj zone mundësinë për të mësuar dhe ruajtur gjuhën amtare, transmeton albinfo.ch.
Nisma është realizuar me mbështetjen e Konsullatës së Përgjithshme të Republikës së Kosovës në Shtutgart. Në hapjen e mësimit morën pjesë konsulli i përgjithshëm Hamdi Bërbatovci dhe zëvendëskonsullja Shpresa Rama-Iseni, së bashku me nxënës, prindër dhe përfaqësues të komunitetit shqiptar.
Në kuadër të mbështetjes për procesin mësimor, Konsullata e Përgjithshme e Kosovës në Shtutgart ka shpërndarë tekste mësimore për nxënësit.
Mësimi do të zhvillohet në ambientet e Hillerschule Bi-Bi, nën udhëheqjen e mësueses Leonita Shabani.
Me rastin e fillimit të mësimit, familjet shqiptare në Bietigheim-Bissingen dhe rrethinë janë ftuar t’i regjistrojnë fëmijët e tyre në mësimin plotësues të gjuhës shqipe.
Kjo nismë synon t’u mundësojë fëmijëve të komunitetit shqiptar në këtë pjesë të Gjermanisë ruajtjen dhe zhvillimin e njohurive në gjuhën amtare, krahas arsimimit të tyre në sistemin gjerman./Albinfo.ch


