Vjena zgjeron përdorimin e semaforëve të saj të pajisur me inteligjencë artificiale

Eliobed Suarez

Vjena po zgjeron përdorimin e semaforëve të pajisur me inteligjencë artificiale (IA).

Qyteti ka 200 semaforë me buton për këmbësorët dhe çiklistët, dhe që nga viti 2019 ata janë përmirësuar gradualisht me sisteme të inteligjencës artificiale për të lehtësuar rrjedhën e trafikut.

Tashmë janë instaluar rreth 30 kontrollues inteligjentë trafiku dhe, në vitet në vijim, të gjithë semaforët me buton do të pajisen me sistemin e IA-së. Për shembull, një semafor “që mendon” ndodhet në distriktin e dytë, në kryqëzimin e rrugëve Am Tabor dhe Trunnerstraße.

Në fillim të këtij muaji, distrikti Floridsdorf mori semaforin e tij të parë me IA në kryqëzimin e rrugëve Donaufelder Straße, Theodor-Körner-Gasse dhe Plankenbüchlergasse. Mjedisi, siguria dhe rrjedha e trafikut përfitojnë nga këta semaforë, deklaroi për transmetuesin ORF Departamenti Bashkiak 33 (Wien leuchtet), i cili është përgjegjës për këtë çështje.

Sistemi njeh patericat dhe karrocat e fëmijëve

Semaforët përdorin kamera dhe sensorë për të monitoruar një sipërfaqe prej rreth 30 metrash katrorë. Sistemi identifikon se sa njerëz po presin te semafori dhe kush dëshiron realisht të kalojë rrugën.

IA gjithashtu vlerëson kohën e nevojshme për kalim, duke marrë parasysh karrocat e invalidëve dhe ato të fëmijëve. Për shembull, nëse diktohet përdorimi i një mjeti ndihmës për ecje, sistemi kalon automatikisht në një fazë më të gjatë të dritës jeshile, me qëllim që trafiku të jetë më gjithëpërfshirës.

Bashkia deklaron se nuk ruhen imazhe

Pas prezantimit të gjeneratës së dytë të sistemit, zhvilluesit bënë të ditur se imazhet e kamerave fshihen brenda 50 milisekondave, por mund të ruhen për një kohë më të gjatë nëse është e nevojshme.

Kjo ka të bëjë vetëm me numrin e njerëzve të diktuar në vendkalim dhe kategoritë e tyre. Ky informacion mund të përdoret më pas për të koordinuar sistemet e sinjalizimit dhe për të optimizuar kohëzgjatjen e fazave të semaforit, raporton theinternational, transmeton albinfo.at.

Lidhur me shqetësimet për mbikëqyrjen, Bashkia e Vjenës thekson se “nuk ruhet asnjë imazh nga sistemet që janë në funksionim të drejtpërdrejtë dhe përpunimi kryhet ekskluzivisht në vend”. Nuk ekziston asnjë lidhje e të dhënave përmes së cilës mund të aksesohet kamera, thuhet në deklaratë.

Sistemi është zhvilluar nga Universiteti Teknologjik i Grazit (TU Graz). Brezi i dytë, i përmirësuar, është në përdorim që nga dhjetori i vitit 2024. Fuqia e tij më e lartë llogaritëse dhe modeli i të mësuarit të thellë (deep learning) i mundësojnë atij jo vetëm të identifikojë personat me vështirësi në lëvizje, por edhe të monitorojë disa vendkalime njëkohësisht.

Aktualisht, TU Graz po hulumton se si transporti publik mund të integrohet edhe më mirë në sistem.