Thirrje diasporës: Më 16 shtator, të gjithë në Hagë

Deputeti i Partisë Demokratike të Kosovës (PDK), Artan Behrami, ka bërë thirrje që diaspora të jetë e pranishme në Hagë më 16 shtator.

Përmes një postimi të publikuar në kuadër të platformës “Liria ka emër”, Behrami ka ftuar qytetarët nga diaspora që, së bashku me familjet e tyre, të udhëtojnë drejt Hagës, duke e cilësuar 16 shtatorin si një ditë të rëndësishme për Kosovën.

Në mesazhin e tij, Behrami ka kujtuar mbështetjen e diasporës ndaj krerëve të Ushtrisë Çlirimtare të Kosovës gjatë gjashtë viteve të procesit gjyqësor në Hagë.

“Për gjashtë vjet kemi qëndruar bashkë me krerët e UÇK-së”, thuhet në thirrjen e publikuar nga Behrami, i cili ka theksuar se përkrahësit kanë qenë të pranishëm në seancat gjyqësore dhe jashtë ndërtesës së gjykatës.

Behrami u ka bërë thirrje qytetarëve të diasporës që më 16 shtator të jenë në Hagë, duke e cilësuar këtë si një ditë që, sipas tij, “nuk përsëritet”.

“Diasporë, të mëdhenj e të vegjël, bashkë me familjet tuaja — më 16 shtator, të gjithë në Hagë!”, thuhet në fund të thirrjes.

Ai ka apeluar për pjesëmarrje dhe unitet të diasporës, duke rikujtuar praninë e saj përgjatë gjashtë viteve të procesit në Hagë.