Kosova nderon Joe dhe Shirley DioGuardi, u jep shtetësinë për kontributin e tyre ndër vite

Ushtruesja e detyrës së presidentes së Kosovës, Albulena Haxhiu, ua ka dorëzuar zyrtarisht dekretet e shtetësisë së Republikës së Kosovës Joe DioGuardit dhe Shirley Cloyes DioGuardit.

Joe DioGuardi, ish-kongresmen amerikan dhe ish-president i Ligës Qytetare Shqiptaro-Amerikane, ka qenë për shumë vite një nga zërat më të angazhuar në SHBA në mbështetje të Kosovës dhe të shqiptarëve.

Edhe Shirley Cloyes DioGuardi ka dhënë kontribut të rëndësishëm në promovimin e të drejtave të shqiptarëve dhe në sensibilizimin e qarqeve politike amerikane për çështjen e Kosovës.

Angazhimi i çiftit DioGuardi në Uashington konsiderohet pjesë e rëndësishme e historisë së lobimit shqiptaro-amerikan dhe përpjekjeve ndërkombëtare që i paraprinë konsolidimit të Kosovës si shtet.

Pas marrjes së shtetësisë, Joe DioGuardi foli edhe për zhvillimet aktuale në Kosovë. Ai e cilësoi procesin e krijimit të shtetit të Kosovës si jashtëzakonisht të ndërlikuar, ndërsa shprehu shqetësim për situatën politike dhe institucionale në vend.

DioGuardi bëri thirrje për kujdes në këtë periudhë, duke paralajmëruar se Kosova duhet të jetë veçanërisht e vëmendshme ndaj sfidave që mund të ndikojnë në të ardhmen e saj.

“Ky komb tani po sulmohet nga armiqtë e popullit shqiptar. E urrej ta them në këtë mënyrë, por duhet të jemi të kujdesshëm”, deklaroi DioGuardi.

Dhënia e shtetësisë për çiftin DioGuardi vjen si vlerësim për kontributin e tyre shumëvjeçar në mbështetje të Kosovës dhe të interesave të shqiptarëve në Shtetet e Bashkuara.