Shqipëri: Zjarret dogjën 1.225 hektarë pyje, Vlora më e dëmtuara

Agjencia Kombëtare e Mbrojtjes Civile ka njoftuar se në bazë të të dhënave për shtatë muajt e parë të vitit 2026, pra pa përfshirë muajin gusht, në Shqipëri janë prekur nga flakët 1,255 hektarë.

Qarku më i dëmtuar deri tani është Vlora, me 466 hektarë sipërfaqe të prekur nga zjarret. Ndërsa në nivel kombëtar, korriku kryeson për sipërfaqen e përfshirë nga flakët, me 476 hektarë, i ndjekur nga marsi me 327 hektarë dhe prilli me 296 hektarë.

Mbyllja e verës po rezulton më sfiduese për Shqipërinë, e cila po përballet me zgjerimin e flakëve dhe vështirësitë në menaxhimin e zjarreve, duke sjellë një situatë të përsëritur si në gushtin e një viti më parë, transmeton albinfo.ch.

Sipas të dhënave të Agjencisë Kombëtare të Mbrojtjes Civile, sipërfaqet e prekura nga zjarret në pyje, për muajt janar-korrik 2026, janë:

Korrik: 476 ha

Qershor: 29 ha

Maj: 22 ha

Prill: 296 ha

Mars: 327 ha

Shkurt: 58 ha

Janar: 17 ha

Vlora, qarku më i dëmtuar

Në Vlorë, situata paraqitet edhe më e rënduar. Vetëm në muajin korrik janë prekur 309 hektarë, ndërsa në qershor 21 hektarë.

Të dhënat sipas muajve:

Korrik: 309 ha

Qershor: 21 ha

Maj: 6 ha

Prill: 20 ha

Mars: 45 ha

Shkurt: 48 ha

Janar: 17 ha

Në total, në qarkun e Vlorës janë prekur 466 hektarë

Vështirësitë në përballimin e situatave të mëdha të zjarreve janë evidentuar edhe në raportin e Komisionit Europian për vitin 2025.

Në raport konstatohet se kapaciteti kombëtar është i pamjaftueshëm kur flakët përhapen në shkallë të gjerë, ndërsa Shqipëria ka një frekuencë të lartë të kërkesave për ndihmë ndërkombëtare nga Bashkimi Europian.

“Kapacitetet e reagimit të Shqipërisë shpesh mbingarkohen, veçanërisht në rastin e zjarreve, duke rezultuar në kërkesa më të shpeshta për ndihmë ndaj Mekanizmit të Mbrojtjes Civile të BE-së”.

Komisioni Europian vlerëson se Shqipëria ka nevojë të rishikojë planet e emergjencës dhe të përmirësojë infrastrukturën e paralajmërimit të hershëm. Gjithashtu kërkon që qeveria shqiptare të zhvillojë kapacitetet operative, raporton TCH.

Ndër të tjera, KE i lë detyrë Shqipërisë që të rregullojë komunikimin me qendrën e emergjencave civile në Bruksel për përballimin e krizave.

“Vendi duhet të krijojë lidhjen me Shërbimet Trans-Europiane të Telekomunikacionit midis Administratave (TESTA) si parakusht për t’u lidhur me Sistemin e Përbashkët të Komunikimit dhe Informacionit të Emergjencave (CECIS), së bashku me një përdorim më të mirë të Qendrës së Koordinimit të Reagimit ndaj Emergjencave të Komisionit.”

Rama: 3 avionë zjarrfikës deri në fund të vitit

Për vitin 2026, kryeministri Edi Rama ka deklaruar se Shqipërisë deri në fund të vitit do t’i shtohen 3 avionë zjarrfikës.

Ndërkohë, punonjësit e Drejtorisë së Përgjithshme të Mbrojtjes nga Zjarri dhe Shpëtimit, me vendim të Këshillit të Ministrave, do të përfitojnë nga 20% deri në 50% të pagës për çdo orë shtesë në shërbim, ku nuk mund të tejkalojnë më shumë se 200 orë në vit.

---