FSHF tërheq mbështetjen për Gianni Infantinon

Federata Shqiptare e Futbollit (FSHF) ka vendosur të tërheqë mbështetjen për kandidaturën e Gianni Infantinos për një mandat të ri në krye të FIFA-s. Vendimi u bë publik të enjten përmes një komunikate zyrtare.

Sipas FSHF-së, pas konsultimeve të brendshme dhe një vlerësimi të situatës, është vendosur të revokohet mbështetja e dhënë më herët për presidentin aktual të FIFA-s. Për këtë është njoftuar edhe Sekretari i Përgjithshëm i FIFA-s, Mattias Grafstrom, përmes një letre të nënshkruar nga presidenti i FSHF-së, Armand Duka.

Ky veprim vjen në një kohë kur disa federata evropiane kanë marrë të njëjtin qëndrim, si reagim ndaj planit të Infantinos për shitjen e aksioneve të Kupës së Botës dhe kompeticioneve të tjera të FIFA-s tek investitorë privatë. UEFA ka shprehur kundërshtim të fortë ndaj kësaj ideje, ndërsa Armand Duka është një nga nënpresidentët e saj.

Në komunikatë, FSHF thekson se vendimi është marrë në dritën e zhvillimeve të fundit në futbollin ndërkombëtar dhe qëndrimeve të federatave evropiane lidhur me qeverisjen e FIFA-s. Federata shqiptare rithekson se do të vazhdojë bashkëpunimin me UEFA-n dhe partnerët ndërkombëtarë për të mbështetur një qeverisje të futbollit të bazuar në transparencë, integritet dhe interesin më të mirë të lojës.

Uellsi ishte federata e parë që tërhoqi mbështetjen për Gianni Infantinon, ndërsa tani asaj i është bashkuar edhe Federata Shqiptare e Futbollit.