Deklaratat përmbyllëse në gjykimin ndaj Thaçit e të tjerëve për pengim të drejtësisë, jepen në shtator

Keystone (AP Photo/Jerry Lampen via AP Photo, Pool)

Dhomat e Specializuara të Kosovës në Hagë, kanë njoftuar se është mbyllur faza e paraqitjes së provave në gjykimin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, në gjykimin për vepra penale kundër administrimit të drejtësisë.

Gjykatësi Christopher Cosnell ka lëshuar urdhër, sipas të cilit e deklaroi të mbyllur fazën e provave dhe konfirmoi datat për dosjet përfundimtare dhe fjalët përfundimtare, raporton Betimi për Drejtësi.

Sipas njoftimit të Speciales, 24 gushti 2026 është caktuar si afat për dosjet gjyqësore përfundimtare, në qoftë se do të ketë, kurse 4 shtatori 2026 për dosjet e kundërpërgjigjeve, në qoftë se do të ketë. Ndërkaq, 10, 11 dhe 14 shtatori 2026 u caktua si datë për deklaratat përmbyllëse, transmeton albinfo.ch.

Në seancën fillestare më 27 shkurt 2026, Hashim Thaçi, Bashkim Smakaj, Fadil Fazliu, Isni Klilaj dhe Hajredin Kuçi, u deklaruan të pafajshëm për veprat penale që akuzohen.