Fisnik Asllani drejt RB Leipzigut, marrëveshja arrin vlerën e 30 milionë eurove

Sulmuesi shqiptar pritet t’i nënshtrohet vizitave mjekësore, ndërsa zyrtarizimi i transferimit nga Hoffenheim te RB Leipzig pritet në ditët në vijim.

RB Leipzig ka arritur marrëveshje për transferimin e sulmuesit shqiptar Fisnik Asllani nga Hoffenheim, duke e bërë atë një nga përforcimet më të rëndësishme të klubit gjerman për repartin ofensiv, transmeton albinfo.ch.

Sipas raportimeve të mediave sportive, marrëveshja është mbyllur për një shumë që arrin rreth 30 milionë euro, ndërsa lojtari pritet t’i nënshtrohet vizitave mjekësore përpara zyrtarizimit të transferimit.

Leipzig kishte ndjekur një strategji të qartë gjatë afatit kalimtar, duke synuar fillimisht afrimin e disa sulmuesve të rinj për të përforcuar repartin ofensiv, përpara se të lejonte largimin e Yan Diomande.

Me transferimin e Asllanit, klubi gjerman ka realizuar një nga objektivat kryesorë të merkatos, ndërsa sulmuesi shqiptar konsiderohet një investim me potencial të madh për të ardhmen.

Nëse nuk shfaqen pengesa gjatë kontrolleve mjekësore, marrëveshja mes Hoffenheimit dhe RB Leipzigut pritet të zyrtarizohet së shpejti, duke shënuar një hap të rëndësishëm në karrierën e Fisnik Asllanit./Albinfo.ch

---