Kurti: Sunny Hill e ka vendosur Kosovën në hartën botërore të festivaleve

Kryeministri vlerëson festivalin si një nga ngjarjet më të rëndësishme kulturore dhe turistike në vend

Kryeministri në detyrë, Albin Kurti, e ka cilësuar Sunny Hill Festival si një nga ngjarjet më të rëndësishme kulturore në Kosovë, duke theksuar se festivali ka fituar jehonë ndërkombëtare dhe ka ndikuar në promovimin e vendit në arenën globale, transmeton albinfo.ch 

Sipas Kurtit, festivali i themeluar nga artistja me famë botërore Dua Lipa është shndërruar në një ngjarje që çdo vit tërheq mijëra vizitorë nga vende të ndryshme të botës, duke e pozicionuar Kosovën në hartën ndërkombëtare të festivaleve më të rëndësishme muzikore.

Ai vlerësoi ndikimin që Sunny Hill ka në promovimin e kulturës, turizmit dhe imazhit të Kosovës, duke theksuar se festivali është bërë një urë lidhëse mes vendit dhe publikut ndërkombëtar.

Në përmbyllje të mesazhit të tij, Kurti u uroi të gjithë pjesëmarrësve një përvojë të paharrueshme në edicionin e sivjetmë të Sunny Hill Festival. /Albinfo.ch 

---