Nis seminari mbarëkombëtar për mësuesit e gjuhës shqipe dhe kulturës shqiptare në Diasporë

Në Kosovë ka nisur edicioni i 19-të i seminarit mbarëkombëtar për mësuesit e gjuhës shqipe dhe kulturës shqiptare në Diasporë dhe në mërgatë, një aktivitet i rëndësishëm që synon forcimin e mësimit të shqipes jashtë trojeve shqiptare.

Ministrja e Arsimit e Shqipërisë, Mirela Kumbaro, e cilësoi këtë seminar si një nga veprimtaritë më të rëndësishme vjetore për promovimin dhe zhvillimin e mësimdhënies së gjuhës shqipe në komunitetet shqiptare jashtë vendit.

Seminari, i organizuar nga Ministria e Arsimit e Shqipërisë në bashkëpunim me Ministrinë e Arsimit dhe Shkencës së Kosovës, këtë vit zhvillohet me temën: “Motivimi i nxënësve në diasporë për mësimin e gjuhës shqipe dhe ruajtjen e identitetit kombëtar”.

Në këtë aktivitet marrin pjesë mbi 200 mësues të gjuhës shqipe nga vende të ndryshme të botës, studiues, ekspertë të arsimit dhe përfaqësues institucionesh, të cilët do të ndajnë përvoja, metoda të suksesshme dhe ide të reja për përmirësimin e procesit mësimor.

Në kuadër të përpjekjeve për mbështetjen e arsimit shqip në Diasporë, ka nisur gjithashtu shpërndarja e teksteve mësimore për vitin shkollor 2026-2027 në 15 vende ku jetojnë komunitete të mëdha shqiptare.

Me financim të qeverisë shqiptare, këtë vit do të shpërndahen mbi 5800 paketa mësimore falas për nxënësit dhe mësuesit e Diasporës, duke synuar ruajtjen e gjuhës, kulturës dhe identitetit shqiptar te brezat e rinj jashtë atdheut.