Mbi 12 mijë zjarre pyjore në Francë, dhjetëra mijëra hektarë të djegur

Autoritetet kanë angazhuar qindra zjarrfikës për të vënë nën kontroll flakët, ndërsa janë arrestuar 128 persona.

Franca po përballet me një sezon të rëndë zjarresh pyjore, ku gjatë këtij viti janë regjistruar mbi 12.500 vatra zjarri dhe rreth 44.000 hektarë tokë janë përfshirë nga flakët, transmeton albinfo.ch.

Ministri i Brendshëm francez, Laurent Nunez, bëri të ditur se zjarrfikësit vazhdojnë betejën me disa zjarre të mëdha, ndërsa një nga operacionet më të mëdha po zhvillohet pranë Saumos, në jugperëndim të vendit.

Në këtë zonë janë angazhuar rreth 500 zjarrfikës, të mbështetur nga avionë zjarrfikës, ndërsa rreth 600 banorë janë evakuuar për arsye sigurie. Zjarri ka përfshirë afro 600 hektarë sipërfaqe.

Sipas autoriteteve franceze, deri më tani janë arrestuar 128 persona në lidhje me incidente të lidhura me zjarret.

Ndërkohë, Prokuroria e Bordosë ka nisur hetime për një rast të dyshuar të zjarrvënies së qëllimshme, që dyshohet se çoi në humbjen e jetës së dy zjarrfikësve.

Vatra të reja zjarri janë raportuar edhe në zonën e Nicës dhe në departamentin Correze, ndërsa në Gironde janë regjistruar 14 zjarre, tre prej të cilave mbetën aktive deri në orët e pasdites.

Autoritetet theksojnë se valët e të nxehtit që kanë përfshirë Francën gjatë javëve të fundit kanë ndikuar ndjeshëm në përhapjen e zjarreve pyjore në disa rajone të vendit./Albinfo.ch

---