Konfliktet në vendet e punës shënuan rritje në Zvicër gjatë vitit 2025

Rastet për shkeljen e detyrimit të kujdesit u rritën me 36%, ndërsa ato për largime abuzive nga puna me 26%

Klima në vendet e punës në Zvicër duket se është tensionuar gjithnjë e më shumë. Sipas të dhënave të siguruesit të mbrojtjes juridike AXA-ARAG, gjatë vitit 2025 është shënuar rritje e ndjeshme e kërkesave për ndihmë juridike lidhur me konfliktet ndërmjet punëdhënësve dhe punonjësve.

Rritja më e madhe është regjistruar te rastet e pretenduara për shkeljen e detyrimit të kujdesit nga punëdhënësi, të cilat u shtuan me 36% krahasuar me një vit më parë. Një shkelje e tillë konsiderohet kur punëdhënësi nuk mbron mjaftueshëm shëndetin, integritetin personal ose interesat legjitime të punonjësve, përfshirë edhe mbrojtjen nga ngacmimi dhe mobingu në punë, transmeton albinfo.ch.

Edhe rastet që lidhen me largimet abuzive nga puna u rritën me 26%. Sipas juristëve, një largim mund të konsiderohet abuziv kur lidhet me aktivitet sindikal, kërkesa për paga, përmbushjen e detyrimeve ligjore, si shërbimi ushtarak ose civil, apo me një veçori personale që nuk ka lidhje me marrëdhënien e punës. Në rast të fitimit të procesit gjyqësor, punonjësi mund të kërkojë kompensim deri në gjashtë paga mujore.

Rritje prej 14% është shënuar edhe në mosmarrëveshjet për certifikatat e punës. Punonjësit kanë kërkuar më shpesh këshillim juridik për shkak të formulimeve negative, përshkrimeve të pasakta të performancës ose mungesës së vlerësimit të duhur në këto dokumente. Ekspertët rekomandojnë që korrigjimi të kërkohet fillimisht me shkrim dhe me propozime konkrete, ndërsa në mungesë të marrëveshjes çështja mund të dërgohet në procedurë pajtimi ose në gjykatë.

Megjithatë, Shoqata Zvicerane e Punëdhënësve i relativizon këto shifra. Sipas saj, statistikat tregojnë vetëm rritjen e rasteve të raportuara te siguruesi juridik dhe jo domosdoshmërisht rritje të shkeljeve të dëshmuara apo të dënimeve ndaj punëdhënësve. Organizata vlerëson se punonjësit mund të jenë bërë më të gatshëm për t’iu drejtuar sigurimit të tyre juridik.

---