Gjermania teston aplikacion për kthimin e TVSH-së, tregtarët zviceranë shprehin shqetësime

Gjermania ka nisur testimin e një aplikacioni që ua lehtëson blerësve kthimin e TVSH-së, një masë që pritet të nxisë edhe më shumë blerjet ndërkufitare dhe që ka ngjallur shqetësime te tregtarët zviceranë.

Që nga mesi i muajit qershor, qytetarët nuk kanë më nevojë të ndalen në doganën gjermane për të marrë rimbursimin e TVSH-së. Mjafton të skanojnë faturën e blerjes përmes një aplikacioni të ri.

Aplikacioni, i quajtur dAKZ (shkurtim i emrit gjerman Digitaler Ausfuhrkassenzettel, që do të thotë “kupon digjital eksporti”), është një projekt pilot i autoriteteve doganore gjermane.

Sistemi funksionon në mënyrë të thjeshtë: në momentin e pagesës, arkëtari skanon barkodin e aplikacionit të klientit dhe fatura ruhet automatikisht në telefonin e tij. Falë teknologjisë së gjeolokalizimit, aplikacioni identifikon kalimin e kufirit dhe konfirmon automatikisht eksportimin e mallrave.

Kjo do të thotë se blerësit zviceranë nuk kanë më nevojë të plotësojnë formularët në letër për të kërkuar kthimin e TVSH-së gjermane prej 19 për qind. Përveç kursimit të kohës për qytetarët, procedura redukton edhe ngarkesën e punës për doganierët, të cilët çdo vit vulosin miliona formularë.

“Ne kemi rreth 200 punonjës përgjatë kufirit me Zvicrën që merren ekskluzivisht me vulosjen e formularëve të eksportit”, deklaroi Antje Bendel, zëdhënëse e zyrës kryesore doganore në Lörrach, pranë Bazelit. Sipas saj, falë aplikacionit këta punonjës mund të angazhohen në detyra të tjera.

Përfitime për tregtarët gjermanë

Edhe bizneset gjermane e kanë mirëpritur procedurën e re. Në rajonet kufitare, një në tre klientë vjen nga Zvicra.

“Vlerësojmë se konsumatorët zviceranë shpenzojnë çdo vit nga një deri në dy miliardë euro në Gjermani”, tha Uwe Böhm, drejtor i Dhomës së Tregtisë dhe Industrisë së Rajonit Oberrhein–Liqeni i Konstancës.

Shqetësime në Zvicër

Në anën zvicerane, megjithatë, ekziston frika se kjo risi do t’i motivojë edhe më shumë qytetarët të bëjnë pazar në Gjermani, ku çmimet janë më të ulëta.

Aktualisht, mallrat e blera në Gjermani me vlerë deri në 150 franga zvicerane në ditë janë të përjashtuara nga TVSH-ja zvicerane. Për këtë arsye, tregtarët zviceranë kërkojnë që ky kufi të ulet në 50 franga.

“Kjo do të mbyllte boshllëkun për ata që bëjnë blerje në Gjermani me vlerë mbi 50 euro, por nën kufirin prej 150 frangash, duke shmangur kështu pagesën e TVSH-së si në Zvicër, ashtu edhe jashtë saj”, deklaroi Patrick Erny, drejtor i Federatës Zvicerane të Tregtisë me Pakicë.

Aplikacioni është në fazë testimi që nga mesi i qershorit. Nëse rezultatet do të jenë pozitive, autoritetet gjermane planifikojnë ta zgjerojnë përdorimin e tij në të gjitha pikat kufitare me Zvicrën.

---