Qiratë në Zvicër: A mund të kërkoni ulje të qirasë gjatë valës së të nxehtit?

Temperaturat e larta të verës mund t’i bëjnë disa banesa në Zvicër pothuajse të pabanueshme. Por a kanë qiramarrësit të drejtë të kërkojnë ulje të qirasë nëse apartamenti mbinxehet?

Përgjigjja është: po, por varet nga ndërtesa dhe rrethanat.

Sipas praktikës gjyqësore në Zvicër, banesat e ndërtuara pas vitit 2016 duhet të ruajnë një temperaturë normale të brendshme prej rreth 20–21°C.

Në ndërtesat me standard energjetik Minergie, temperatura e pritshme është edhe më e ulët, rreth 19–20°C.

Nëse temperatura brenda banesës mbetet 3 deri në 5 gradë më e lartë për një periudhë të zgjatur, kjo mund të konsiderohet si një mangësi e objektit dhe qiramarrësi mund të ketë të drejtë për ulje të qirasë, shkruan The Local, transmeton albinfo.ch.

Për banesat më të vjetra situata është më e ndërlikuar. Megjithatë, ekzistojnë precedentë ligjorë. Në një rast të vitit 2010, një gjykatë vendosi që një pronar duhej të instalonte roleta mbrojtëse nga dielli dhe u dha qiramarrësve një ulje prej 5% të qirasë derisa problemi të zgjidhej, pasi banesa nuk plotësonte kushtet normale të banimit gjatë verës.

Ndërkohë, në Zvicër po shtohen kërkesat për ta bërë këtë të drejtë më të qartë në ligj. Propozimet synojnë t’u japin të gjithë qiramarrësve mundësinë të kërkojnë ulje të qirasë kur temperaturat e larta e bëjnë banesën të vështirë për t’u jetuar, duke nxitur njëkohësisht pronarët të investojnë në mbrojtje më të mirë nga nxehtësia.

---