Strehimoret e kafshëve në Zvicër përshtaten përballë valës së të nxehtit

Shëtitje më të shkurtra, pishina, ventilatorë dhe kujdes i shtuar për shpendët e zvarranikët – temperaturat e larta po detyrojnë qendrat e mbrojtjes së kafshëve të marrin masa të reja

Me intensifikimin e vapës, strehimoret dhe shoqatat për mbrojtjen e kafshëve në gjithë Zvicrën kanë ndryshuar rutinat e tyre për t’i mbrojtur kafshët nga temperaturat e larta, transmeton albinfo.ch.

Qentë mbahen në ambiente më të freskëta gjatë pjesëve më të nxehta të ditës, ndërsa shëtitjet zhvendosen në mëngjes herët ose në mbrëmje dhe shkurtohen ndjeshëm. Vullnetarëve u rekomandohet që qentë t’i shëtisin në zona pyjore dhe të kontrollojnë paraprakisht temperaturën e asfaltit me dorë, pasi sipërfaqet e nxehta mund t’ua djegin putrat.

Në Neuchâtel, strehimoret kanë vendosur çadra, pishina, dyshekë freskues dhe ventilatorë, ndërsa janë mbjellë edhe pemë për të krijuar më shumë hije. Për shkak të vapës së madhe, disa shëtitje me qen janë anuluar plotësisht.

Masat nuk kufizohen vetëm te qentë. Në qendrën e rehabilitimit të shpendëve të egër në Biel, zogjve u ofrohen banja, fruta të ngrira dhe sisteme spërkatëse. Ekspertët paralajmërojnë se edhe zvarranikët mund të rrezikohen seriozisht nga temperaturat e larta, sepse u nevojitet një zonë e freskët për ta rregulluar temperaturën e trupit. Kur i gjithë terrari mbinxehet, pasojat mund të jenë fatale.

Stafi duhet të kontrollojë vazhdimisht hidratimin e kafshëve, veçanërisht të atyre më të vjetra, dhe të reagojë menjëherë në rast të shenjave të mbinxehjes. Për pronarët e zvarranikëve rekomandohet fikja e llambave dhe pajisjeve ngrohëse kur temperatura e ambientit kalon 30 gradë, si dhe shmangia e ekspozimit të terrarit në rrezet direkte të diellit.

Qytetarëve u sugjerohet gjithashtu të vendosin enë të cekëta me ujë në kopshte për shpendët dhe kafshët e egra. Gjatë verës, strehimoret përballen edhe me më pak birësime, pasi shumë njerëz ndodhen me pushime dhe nuk janë të gatshëm të marrin një kafshë të re në shtëpi.

---