15-vjeçari shqiptar shpallet kampion bote në Olimpiadën Ndërkombëtare STEM

Loris Qosja fiton medaljen e artë në Itali, triumfoi mes pjesëmarrësve nga 56 shtete, duke i sjellë Shqipërisë një tjetër sukses të madh në arenën ndërkombëtare.

Nxënësi 15-vjeçar Loris Qosja nga shkolla “7 Marsi” në Cërrik ka arritur një tjetër sukses të jashtëzakonshëm në arenën ndërkombëtare, duke fituar medaljen e artë në finalen e International STEM Olympiad, e zhvilluar në Itali, transmeton albinfo.ch.

Në një garë ku morën pjesë të rinj nga 56 vende të botës, Loris u dallua për rezultatet e tij të shkëlqyera, duke e ngritur flamurin shqiptar në një prej kompeticioneve më prestigjioze ndërkombëtare në fushën e shkencës, teknologjisë, inxhinierisë dhe matematikës (STEM).

Ky është suksesi i dytë i madh ndërkombëtar për 15-vjeçarin brenda këtij viti. Pak muaj më parë, ai u shpall fitues edhe në Olimpiadën Ndërkombëtare të Matematikës në Orlando të Shteteve të Bashkuara të Amerikës, duke konfirmuar talentin e tij të jashtëzakonshëm.

Triumfi në Itali përbën një tjetër moment krenarie për Shqipërinë dhe dëshmon potencialin e të rinjve shqiptarë në garat më elitare ndërkombëtare të shkencës dhe teknologjisë./Albinfo.ch

---